Ustoz haqida ma'lumotlar

• Ismi sharifi: Dilorom Xoshimova
• Tug'ilgan sanasi: ko'rsatilmagan
• Lavozimi: BOSHLANG'ICH SINF O'QITUVCHISI
• Faoliyati: 29 yillik samarali pedagogik faoliyat va boy tajribaga ega bo‘lgan ustozimiz ta’lim-tarbiya sohasida o‘zining yuksak kasbiy mahorati, ijodkorligi hamda metodik faoliyati bilan alohida e’tirof etiladi. Hamkasblari uni, avvalo, tashabbuskor, talabchan, kreativ fikrlovchi, mehribon va fidoyi pedagog sifatida qadrlaydilar. Ustoz tasviriy san’at va mehnat ta’limini o‘qitish metodikasi yo‘nalishida ko‘plab samarali ishlarni amalga oshirgan. Ushbu yo‘nalish bo‘yicha o‘quv dasturlari, metodik qo‘llanmalar hamda ma’ruza materiallarini yaratishda faol ishtirok etgan. Nizomiy nomidagi Toshkent davlat pedagogika universiteti bilan hamkorlikda "Mehnat o‘qitish metodikasi" darsligini o‘zbek va rus tillarida tayyorlashda mualliflar safida qatnashgan. Shuningdek, pedagoglar uchun bir qator metodik qo‘llanmalar muallifi hisoblanadi. Yoshlar ma’naviy-ma’rifiy tarbiyasiga qo‘shgan munosib hissasi uchun jamoat tashkilotlari bilan samarali hamkorlik olib borgan hamda bir necha bor faxriy yorliqlar bilan taqdirlangan. "Orasta qizlar" klubi faoliyatini tashkil etishda mas’ul sifatida faoliyat yuritib, qizlar tarbiyasiga oid metodik qo‘llanma va ma’ruzalar to‘plamini yaratgan. Mehnat faoliyatini 1997-yilda ta’lim tizimida boshlagan. Dastlab rahbar kotibasi lavozimida ishlab, oradan bir yil o‘tib boshlang‘ich sinf o‘qituvchisi sifatida pedagogik faoliyatini davom ettirgan. 2005-yildan pedagog kadrlar tayyorlash tizimida faoliyat yuritib, "Tasviriy san’at va mehnat metodikasi" kafedrasida mutaxassis o‘qituvchi sifatida ishlagan. 2015-yildan mazkur kafedraga rahbarlik qilib, yetakchi o‘qituvchi sifatida samarali mehnat qilgan. 2018-yildan esa nodavlat ta’lim muassasasida ma’naviy-ma’rifiy ishlar bo‘yicha direktor o‘rinbosari lavozimida faoliyat olib borgan. Bugungi kunda ustozimiz Grand ta’lim maktabi jamoasining eng kreativ pedagoglaridan biri sifatida e’tirof etiladi. U maktabdagi ko‘plab innovatsion va noodatiy g‘oyalar muallifi bo‘lib, har bir darsga va darsdan tashqari mashg‘ulotlarga o‘ziga xos ijodiy yondashadi. Dars jarayonida vaziyatdan kelib chiqib improvizatsiya qilish, o‘quvchilarni qiziqtira oladigan yangi usullarni qo‘llash va har bir mashg‘ulotni unutilmas taassurotga aylantirish ustozning eng yorqin fazilatlaridandir. Tashqi ko‘rinishda talabchan va jiddiy bo‘lsa-da, har bir o‘quvchisiga mehr bilan yondashadigan, ularning qalbidan joy ola biladigan chin ma’nodagi fidoyi ustozdir.